براد شاهي وطرف خبزة مله

[ندعوك للتسجيل في المنتدى أو التعريف بنفسك لمعاينة هذه الصورة]

براد شاهي وطرف خبزة مله ▀ خير من وليمه في اقصور الذله
براد في وهطايا ▀ على الريح رتمه دايرين وقايا
عثاليب نار وطاسة الشوهايا ▀ شفا فيه ريحتهن دوا للعله
ورفقة تريس أكرز اجواد سمايا ▀ تقرا كوامنهم اتقول مجله
لايهتكو حرمة اعروض ولايا ▀ بلغو النميمه ولاحديث الزله
وللفجر بكري كبرو صلايا ▀ مايحركو كانش بعد بسم الله
حد النصاعه ناصعين نوايا ▀ وحد الشجاعه موش كار الذله
وعندي اتيوتا لا غنايم جايا ▀ من جيش لاهي من قضا ورفله
حلال حلو هك اتكون حد الغايا ▀ على وين تغرق غيرها تسله
وفيها على الصنف القديم مزايا ▀ الذاهب على شوره اقمار اتدله
في بر صامل فيه بو مرغايه ▀ أدغم رشاده كيف قعر الحله
مرات تلقاها سماح امرايه ▀ سرير اجدلي فيه المناصب قله
ومرات تحصل في عتل جرايا ▀ المقشوط بيد الصانعين ايحله
هاذاك عندي حق فيه اهوايا ▀ لافيه نشعر بالقلق لا انمله
براد شاهي وطرف خبزة مله ▀ خير من وليمه في اقصور الذله

مع اطريف مله ايعدي ▀ براد شاهي فوق جمر امهدي
من النار مشوشط اتقول امصدي ▀ ولنبوب يكتح في الرغواي بله
اتقول غير هايج في اوقات تحدي ▀ شابح جمل في الذود جا يختله
الطاوس بعد تخديم نكهه يدي ▀ وسكر على المقدار ماايتعله
تلاقن على الطاسه ايديه ويدي ▀ شوهاي موحنك وقاد محله
وشاعر كلامه في النفوس ايغدي ▀ منك اليا تمتم العقل ايسله
باعه طويل وبالحكام ايندي ▀ الميعاد مايفرق حشا وا كله
خير مانسعر في وليمه خدي ▀ في قصر مافيه الكرامه بله
فيه منو خشمه في الوطا متردي ▀ وفيه من اللي خشمه الفوق تعله
سبابيط دايرهم خدم ياودي ▀ احذاه وين مايطرو النبي ماصلى
براد شاهي وطرف خبزة مله ▀ صحيح خير من شبعة اقصور الذله
[ندعوك للتسجيل في المنتدى أو التعريف بنفسك لمعاينة هذه الصورة]